De Samichlaus

De Samichlaus chund gschlaage hei
Mit lèèrem Sack und müede Bei.
„Schmutzli“, seid er, „s isch fang e Gruus!
I jedem Garte, a jedem Huus
tüend hunderttuusig Birrli funkle,
s wott gar nümm richtig afo tunkle!

Und die lüüchtige Chläus mit dicke Ränze!
Schlächte Gschmack kännt keini Gränze.
Vor Schreck hed der Esel afo streike,
alls hani müesse sälber schleike.
I has chuum gschafft, es isch kei Wunder,
für d Chind gits all Johr no mee Plunder.“

Er ziet d Stifel aab, mit tüüfem Schnuuf.
Denn macht er e Fläsche Rooten uf.
„Chumm, Schmutzli, fertig umegrännt,
jetz wämmer e gnüüsse, der Advent.“
So höcklid beid im Cherzeschy
Und trinkid zämen es Glesli Wy.

Willy Brunner-Rey lebt in Villmergen am Rietenbergweg 18. Für sein heimatkundlich/ historisches Engagement wurde er im letzten November mit dem Vilmar-Kulturpreis der Villmerger Ortsbürgerstiftung ausgezeichnet.